Institut Pasteur : Andrasana amin’ny 13 mey ny valin’ny fanadihadiana anatiny

Manoloana ny olana niseho tamin’ny famoahana ny antontan’isa mahakasika ny fivoaran’ny valanaretina coronavirus dia nampiantso ireo tompon’andraikitra ao amin’ny ivontoerana fitiliana « Institut Pasteur de Madagascar » (IPM), io tolakandro io, ny fitondram-panjakana, izay nosoloin’ny Praiminisitra Ntsay Christian tena, ny minisitry ny Fahasalamam-bahoaka, ary ny minisitry ny Raharaham-bahiny.

Hita nandritra izao fihaonana izao fa misy ny tsy fahatomombanana teo amin’izany antontan’isa izany ka nangatahana fanazavàna ny teo anivon’ny IPM ary hisy fanadihadiana anatiny, hiarahana amin’ny ministeran’ny Fahasalamam-bahoaka, hatao amin’izany ivontoerana fitiliana izany, ka ho azo amin’ny alarobia faha-13 mey ho avy izao ny fehin-kevitra momba izany, hahafantarana ny zavatra tena nisy.

Nampahafantatra ny Praiminisitra fa taorian’izao toe-javatra izao dia hametrahana fandaminan’asa sy arofenitra mazàva ny fomba hifehezana ny dingam-pitiliana rehetra, sy ny fahafahana manao fitiliana faharoa (contre-test) hanamarinana ny valim-pitiliana azo, raha toa ka misy tsy fahatomombanana hita.

Notsindrian’ny Lehiben’ny governemanta fa tsy azo ekena ny filalaovana ny aim-bahoaka, ary ny fitondram-panjakana dia mametraka ho laharam-pahamehana ny fahamarinam-pototry ny zavatra rehetra atao eto amin’ny Firenena, ka mila mitandrina ny rehetra, hoy izy, na amin’ny famoahana antontan’isa, na amin’izay fanambaràna atao mahakasika ny valanaretina covid-19.